ПІСКЕН ТАУЫҚ , Байдың үйі. Төрде, үстел басында бай отыр. Әйелі піскен тауық әкеледі. Оны алдына ала бергенде есік тоқылдайды. Бай жақтырмай, әйелін көріп келуге жұмсайды. Әйелі барып келіп:
— Бір қайыршы кеп тұр. Қарыны аш екен. тамақ сұрайды. Тауықтың бір бөлігін берсек қайтеді?
— Не дейді?! Қуып таста сүмелекті. Біз ол үшін тамақ тауып, ол үшін өмір сүріп жүрген жоқпыз! Әйелі:
— Шын қиналып тұрған сияқты. Менің-ақ сыбағамды бере салайықшы…
— Қуып таста дедім ғой саған! Неменеге жаның аши қалды. Осыларды көрсем ызам келеді. Әйел шығып кетеді. Арада айлар, жылдар өтеді.
Әйел жұпыны, үйде отыр. Күйеуі келіп:
— Қатын, үрерге ит, сығарға бит қалмады. Қарыз сұрайтын да ешкім жоқ. Міне қанша күн болды, талғажау етер, өзек жалғар нәрсе жоқ. Бүйте берсек екеуміз де аштан өлетін шығармыз. Әйелі:
— Сабыр етейік, бұл да бір басқа түскен сынақ шығар… Ері:
— Жоқ, тыриып аштан қатсақ, көмусіз қалармыз. Одан да мен саған талақ беріп, төркініңе қайтарамын. Екеуміз енді өз күнімізді өзіміз көрейік. Болды.
Бәрі де Алланың жазғанындай, күйеуінің айтқанындай жасалды.
Сонымен, тағы бірде мынадай жағдай болады.
Бай дастархан, төрде ер кісі отыр. Әйелі піскен тауық әкеледі. Күйеуі:
— Ту-у дәмді иісін-ай шіркіннің! Кел, өзің де отыра қал!
Екеуі отырып, ортаға тауықты ала бергенде, есік тоқылдайды. Әйелі лып етіп көтеріліп:
— Мен барып көріп келе қояйын – деп шығып кетеді. Қайта келіп:
— Бір қайыршы кеп тұр. Тамақ сұрайды. Не істейік?
— Мә, тауықты түгел бере сал.
— Өзіміз қайтеміз?
— Ештеңе етпейді. Басқа тамақ та жетер. Алла бермей жатқан жоқ қой. Мынаны алып бара сал.
Әйел тауықты алып шығып кетеді. Қайтып шәй ішіп отырған күйеуіне келеді де, жылап жібереді.
— Не болды, жаным?
— Мен бір дәулетті кісінің жары едім. Ол кісі дінсіздеу еді. Алла берген дүниені өзім тауып жатырмын деп есептейтін. Бір күні дәл осылай дастархан басында отырғанымызда бір қайыршы қайыр сұрап келді. қожайыным оған тамақ бергізбей, қайтарып жіберді. Ол әрине, садақа бермеу – ризықтың жолын кесетініне сенбейтін. Сол күннен бастап қожайынымның сауда да, басқа кәсіпкерлік істеріндеде жолы болмады. Ақыры әбден кедейленіп біткен соң, маған талақ берді де, төркініме қайтарды. Одан, міне сізге жар болдым. Ал жаңағы келген қайыршы менің сол күйеуім екен. жылап отырған себебім осы еді…
— Ия, тағдыр деген қандай ғажап. Сол күні күйеуің тауық бергізбей қуып шыққан қайыршы мен едім ғой